د بشري حقونو څار نړیوال سازمان (هیومن رایټس واچ) په ایران کې اعدامونه د انساني حقونو سرغړونه بللې او له نړیوالې ټولنې یې غوښتي دي چې د تهران هغه اقدامات وغندي.
سازمان د مې پر ۱۲مه په یوه بیان کې په ورستیو کې په ایران کې پر زیاتو شویو اعدامونو اندېښنه ښودلې ده او ویلي دي چې د اپرېل له وروستیو راهیسې په هغه هېواد کې لږترلږه ۶۰ تنه په دار ځړول شوي دي.
په بیان کې د سازمان د څېړونکې تارا سپهري فر له خولې راغلي چې نړیواله ټولنه دې "په ښکاره وېره خپروونکی رجحان وغندي" او پر تهران دې فشار راوړي چې د اعدام سزاګانې ودروي.
سپهري فر زیاته کړې چې ایران خپل هغه وګړي اعداموي چې په هغه هېواد کې د اساسي حقونو او بدلونونو غوښتونکي دي.
دا په داسې حال کې ده چې ایران د مې پر اتمه د الحاد او اسلامي مقدساتو ته د سپکاوي پر تور دوه کسان اعدام کړل. تر دې دوه ورځې وړاندې یې د حبیب اسیود په نوم یو ایرانی توکمه سویډنی وګړی په دار ځړولی وو.
ملګرو ملتونو هم په ایران کې د اعدامونو شمېر وېروونکی بللی او د مې پر نهمه یې پر تهران غږ کړی وو چې د مرګ سزاګانې ودروي.
