د بخښنې نړیوال سازمان (ایمنسټي انټرنیشنل) ویلي په ۲۰۲۲ کال کې په نړۍ کې د اعدام سزا تر ریکارډ کچې لوړه شوې ده او تر ټولو زیاتې د مرګ سزاګانې په ایران کې ورکړل شوې دي.
د نړۍ په بېلابېلو هېوادونو کې د اعدام د سزاوو په اړه ایمنسټي انټرنېشنل خپل کلنی راپور د مې پر ۱۶مه خپور کړی دی. په راپور کې راغلي چې تېر کال په ۲۰ هېوادونو کې ۸۸۳ کسانو ته د مرګ سزا ورکړل شوې ده چې پکې په ایران کې ۵۷۶ کسان اعدام شوي دي.
دا په داسې حال کې ده چې ایران د ۲۰۲۲ز کال له مني راهیسې له ناکراریو سره مخامخ دی. په هغه هېواد کې تېر کال د سېپټېمبر په نیمايي کې د پوليسو په بند کې د ۲۲ کلنې مهسا امیني تر مړینې وروسته پراخې مظاهرې پیل شوې. حکومت له دغو مظاهرینو په زرګونو کسان ونيول.
په ايران کې هر کال په لسګونو کسانو ته د مرګ سزاوې اورل کيږي. په ۲۰۲۱زکال کې په دې هېواد کې ۳۱۴ کسانو ته د اعدام سزا ورکړل شوې وه.
د ایمنسټي انټرنېشنل ترمخه، تېر کال له ایران وروسته په سعودي عرب کې تر ټولو زیات ۱۹۶ کسانو ته د اعدام سزا ورکړل شوې ده. په هغه هېواد کې په ۲۰۲۱زکا کې ۶۵ کسانو ته د مرګ سزا ورکړل شوې وه. بلخوا تېر کال په مصر کې ۲۴ کسانو ته د مرګ سزا ورکړل شوې ده.
