د پېښور پوهنتون چارواکي وايي، د مالي ستونزو له کبله د کارکوونکو تنخاګانې نه شي ورکولی او د ستونزې د هوارۍ لپاره ۴۰۰ مېلیونه روپیو ته اړتیا لري.
د پوهنتون ویاند محمد نعمان د مې پر ۲۱مه مشال راډیو ته وویل چې په مارچ کې د زده کوونکو، استادانو او د پوهنتون د کارکوونکو د احتجاجونو له کبله ګڼو زده کوونکو فیسونه نه دي ورکړي چې ورسره د پوهنتون مالي ستونزې نورې هم زیاتې شوي دي.
هغه وویل چې د لوړو زده کړو کمېشن ته یې هم ۹۰ کروړه روپۍ پاتې دي.
د پوهنتون انتظامیې د مې پر ۱۸مه له صوبايي حکومته په یو لیک کې غوښتنه کړې چې د پوهنتون د ستونزو هواري لپاره دې ورته ۴۰۰ مېلیونه روپۍ ورکړي.
پېښور پوهنتون له یوشمېر کلونو راهیسې د مالي مشکلاتو ښکار دی او په تېرو وختونو کې یې هم استادانو او نورو کارکوونکو د خپلو حقونو لپاره مظاهرې کړې دي.
بلخوا د پوهنتون یوشمېر زده کوونکو مشال راډیو ته ویلي چې د احتجاجونو له وجې ورته استادانو درس نه دی ویلی نو ځکه هغوی فیسونه نه ورکوي.
استادانو د مارچ پر شپږمه نېټه له هغه وروسته احتجاج پیل کړی وو چې د پوهنتون امنیتي چارو مسوول ثقلین بنګښ او د اسلامیه کالج استاد پروفیسر بشیر په دوو جلا جلا پېښو کې ووژل شول.
احتجاج تر ۴۱ ورځو روان و چې د اپرېل پر ۱۸مه د خیبر پښتونخوا ګورنر او استادانو ترمینځ تر مذاکراتو وروسته ختم شو.
