روسیې د مې پر ۳۰مه د اوکراين پر سرښار کییف د بې پیلوټه الوتکو تازه بریدونه کړي دي.
دا په تېرو درو ورځو کې پر کييف څلورم برید وو چې تر دې دمه پکې د لږترلږه یو کس د وژنې او د یوشمېر نورو د ټپي کېدو خبرونه دي. خو اوکرایني چارواکو ویلي چې زیاتره بې پیلوټه الوتکې د کييف هوايي دفاعي نظام ویشتلې دي.
د کییف ښاروال ویتالي کلېچکو پر ټېلېګرام ويلي چې د کييف په يوشمېر ولسوالیو کې اور لګېدلی دی. نوموړي زياته کړې چې "یو کس مړ شوی او ژوبل شوي څلور واړه کسان د هولوسیېفسکيې ولسوالۍ په روغتون کې بستر شوي دي."
د اوکراین د ملي پولیسو سرپرست مشر ایوان ویهیفسکيې پر ټېلېګرام ويلي چې پر کییف او د هغه پر شاوخوا سیمو په برید کې ۱۳ کسان ژوبل شوي هم دي.
په عین حال کې، د روسیې د دفاع وزارت ویلي چې په مسکو کې اته بې پیلوټه الوتکې ویشتل شوي یا جام کړل شوې دي چې په وينا يې دا د "کیيف رژیم" له خوا "ترهګر برید" وو.
د روسيې "بازا" ټېلېګرام چینل ویلي چې په برید کې تر ۲۵ زياتو بې پیلوټه الوتکې شاملې وې.
خو په خپلواکه توګه د دې راپورونو تصدیق نه دی شوی.
بل خوا د سپینې ماڼۍ یوه ویاند د واشنګټن دریځ تکرار کړ چې په روسیه کې دننه د بریدونو ملاتړ نه کوي.
