د افغانستان کرکټ بورډ ويلي چې د هغه هېواد وتلی کرکټ ستوری راشد خان به د سري لنکا خلاف په لومړیو دوو يو ورځنيو سیالیو کې نه لوبېږي.
بورډ د مې پر ۳۱مه په خپله رسمي فېسبوک پاڼه خبر ورکړی چې راشد خان پرون (د مې پر ۳۱مه) د تمریناتو پرمهال په ملا کې درد محسوس کړ.
اعلاميه زياتوي، راشد خان ته ډاکترانو تر معایناتو وروسته ویلي چې تر یوې اوونۍ پورې باید ارام وکړي. "د لوبډلې د ډاکتر او فیزیو په وینا، راشد به په یاده موده کې تر بشپړې درملنې لاندې وي او هیله شته چې د سری لنکا پر وړاندې وروستۍ یو ورځنۍ نړیوالې لوبې په موخه له لوبډلې سره یوځای شي."
دا لا معلومه نه ده چې د نوموړي پرځای به کوم لوبغاړی د دې سیالیو لپاره غوره شي.
راشد خان د مارچ په وروستيو کې له پاکستان سره د دریو ۲۰ اووره سياليو د لړۍ له ګټلو وروسته هند ته ولاړ او هلته يې شاوخوا دوې مياشتې د انډيين پریميیر ليګ يا ای پي اېل کرکټ ۲۰ اووره سیاليو کې برخه واخيسته.
د افغانستان او سري لنکا کرکټ لوبډلې به د درو يو ورځنيو يا ۵۰ اووره سياليو لړۍ سر له سبا (جون دويمې) پيلوي. د دواړو لوبډلو ترمينځ به دويمه سيالي د جون پر څلورمه او درېيمه او وروستۍ سيالي به د جون پر اوومه کېږي.
دا لوبې به د کابل پر وخت د سهار پر نهو او د پېښور پر وخت د سهار پر ۹:۳۰ بجو پېلېږي.
د افغانستان کرکټ لوبغاړي له شاوخوا یوې اوونۍ راهېسې په سري لنکا کې دي او له کوربه هېواد سره لوبو ته چمتوالی نیسي.
