د بلوچستان په کېچ ضلع کې د ایران پولې ته څېرمه د وسلوالو په بريد کې دوه پاکستاني سرتېري وژل شوي دي.
د پوځ د عامه اړیکو دفتر (ای اېس پي ار) نن (د جون پر لومړۍ نېټه) په یو بیان کې ویلي چې وسلوالو د کېچ په سنګوان سيمه کې پر امنيتي پوسته په داسې حال کې بريد وکړ چې سرتېرې "چمتو" ناست ول.
په بيان کې راغلي چې سرتېرو د وسلوالو بريد پر "شا وتمباوه"، خو "د ډزو په تبادله" کې کې دوه سرتېري ووژل شول.
بيان زياتوي چې امنیتي ځواکونو په "سمدستي توګه" په سیمه کې د وسلوالو خلاف عملیات پیل کړي او له ایرانيو چارواکو سره هم په اړیکه کې دي.
تر دې دمه د دې بريد ذمه واري چا نه ده منلې خو په تېرو وختونو کې د بلوچستان په بلوڅ مېشتو سيمو کې د دا ډول زياترو بريدونو ذمه واري بلوڅ بېلتون غوښتونکې ډلې پر غاړه اخلي.
د مې پر ۲۰مه د بلوچستان په زرغون سيمه کې د وسلوالو او امنيتي ځواکونو ترمینځ په نښته کې درې سرتېري او يو مشکوک وسلوال وژل شوی وو. د هغه بريد ذمه واري بلوڅ بېلتون غوښتونکي ډلې "بلوچ ليبرېشن ارمي" (بي اېل اې) منلې وه.
تر هغه وړاندې هم د اپرېل پر لومړۍ نېټه د بلوچستان په کېچ ضلع کې د ایران پولې ته څېرمه د وسلوالو په یوه برید کې څلور سرتېري وژل شوي ول.
