د قطر په مرکز دوحه کې په پاکستان او افغانستان کې د ګوزڼ یا پولیو له مینځه وړلو پر پروګرام مشورتي غونډه روانه ده.
د پولیو اړونده د تخنیکي مشورتي ډلې (ټاګ) هغه څلور ورځنۍ غونډه د جون پر لومړۍ نېټه پیل شوې وه او د جون پر څلورمه یې وروستۍ ورځ ده.
په غونډه کې شریک د افغانستان د پولیو پروګرام چارواکي سید کمال شاه مشال راډیو ته وویل چې تر غونډې وروسته د پولیو مشورتي ډله خپلې سپارښتنې افغانستان او پاکستان ته وړاندې کوي.
هغه زیاته کړه ''په دواړو هېوادونو کې د پولیو له مینځه وړلو پروګرام به د هغو سپارښتنو په رڼا کې مخ ته لاړ شي.''
پاکستان او افغانستان د نړۍ یوازیني هېوادونه دي چې د پولیو وایرس لا هم پکې موجود دی.
په پاکستان کې وخت به وخت د پولیو پر روغتیايي ډلو او د هغوی پر ساتونکو حملې هم شوې دي. د مې پر ۲۵مه د خیبر په تیرا کې د پولیو د واکسیني ډلې پر ساتونکو په برید کې درې پولیس سرتېري ژوبل شوي ول.
تر هغه وړاندې د مې پر ۱۹مه د بلوچستان د مستونګ ضلعې په سور کارېز کې وسلوالو د پولیو د واکسیني ډلې ساتونکی پولیس سرتېری وژلی وو.
