اوکراین ویلي دي چې د خپلو روانو یرغلیزو عملیاتو پر مهال یې د ختیزې دونېڅک سیمې څلورم کلی هم ازاد کړی دی.
دا په داسې حال کې ده چې په تېرو ۲۴ ساعتونو کې په دونېڅک کې د اوکراینیو او روسیو ځواکونو ترمینځ سختې نښتې شوې دي.
د اوکرایني پوځ مطبوعاتي څانګې د جون پر ۱۲مه وویل چې پر ستوروژووې کلي اوس د اوکراین بیرغ رپېږي او د هېواد د ټولو نیول شویو سیمو تر ازادولو پورې خپلو عملیاتو ته دوام ورکوي.
پوځ له دې خبر سره یوه ویډیو هم خپره کړې ده چې پکې اوکرایني سرتېري په کلي کې د ګزمې پر مهال ښوول شوي دي.
اوکراین د جون پر ۱۱مه ویلي ول چې ځواکونو یې د دونېڅک درې کلي له روسیو پوځیانو نیولي دي. خو په خپلواکه توګه د اوکرایني پوځ د دعوو تصدیق نه دی شوی.
تر دې مخکې د اوکراین د پوځ مشرتابه د جون ۱۲مې پر سهار وویل چې د یکشنبې (اتوار) پر ورځ یې په دونېڅک کې له روسیو ځواکونو سره نښتې شوې دي.
روسیو پوځیانو هم د هغې سیمې جګړې ته ډېره توجه ورکړې ده او هڅه کوي چې دونېڅک او لوهانسک دواړه ونیسي. د جون پر ۱۱مه په بېلابېلو سیمو کې د دواړو خواوو ترمینځ ټولې ۲۵ نښتې شوې وې.
