د خیبر پښتونخوا په کرک کې د اوبو او برېښنا ادارې (واپډا) درې کارکوونکي د بجلۍ ټکان خوړلو له کبله ژوبل شوي دي.
ځايي پولیسو په بیان کې ویلي دي چې درېواړه کارکوونکو په لتمبر سیمه کې د ۱۱،۰۰۰ واټه برېښنا لېږدوونکي تار مرمت کاوه پر مهال یې د یو بل مزي (لاین) برېښنا ونیول.
د پولیسو په وینا، درېواړه کارکوونکي "سخت سوځېدلي" او د پېښور کمپلېکس روغتون ته انتقال شوي دي.
دوی زیاتوي چې د ژوبلو کسانو روغتیايي حالت د اندېښنې وړ دی.
په پاکستان کې د برېښنا تارونو او نظام ترمیموونکي اکثر کافي وسایل نه لري چې د کار پر مهال ځانونه خوندي کړای شي.
