د یونان په سمندر کې د کډوالو د یوې کښتې ډوبېدو په پېښه کې د وژل شویو شمېر ۷۹ ته رسېدلی او ګڼ نور ورک دي.
د جون ۱۴مې پېښه په وروستیو کلونو کې د کډوالو د کښتۍ ډوبېدو له تر ټولو لویو پېښو یوه بلل کېږي.
رویټرز خبري اژانس وايي، د جون پر ۱۵مه ژغورونکو د ډوبو شویو کسانو لټون ته دوام ورکړی دی.
د اروپا د ژغورنې چارو مرستندویه ادارې اژانس ته ویلي دي چې له اټکل سره سم، له ۲۰ څخه تر ۳۰ میټره پورې اوږده کښتۍ کې ۷۵۰ کسان سپاره ول.
د ملګرو ملتونو د مهاجرت اداره وايي، د مساپرو شمېر ۴۰۰ وو خو د یونان حکومت یې لا د شمېر په اړه رسماً څه نه دي ویلي.
چارواکي وايي، د جون ۱۵مې تر غرمې پورې یې ۱۰۴ تنه ژغورلي ول.
د یونان لنډمهالي حکومت د پېښې له کبله د درو ورځو ملي ماتم اعلان کړی دی.
یوې رسنۍ ویلي، هغه کښتۍ له لیبیا څخه یونان ته پر لاره وه. د بحري بېړنیو د لېږد وزارت یوه چارواکي د نوم نه ښوولو په شرط ویلي دي چې په کښتۍ کې سپاره زیاتره کسان د مصر، شام (سوریې) او پاکستان اوسېدونکي ول.
دا په یونان کې په تېرو کلونو کې د کښتیو له تر ټولو خونړیو پېښو یوه ده. تر دې مخکې، د روان کال په فبرورۍ کې د اېټالیا له ساحل سره نېږدې د یوې کښتۍ ډوبېدو په پېښه کې ۹۶ کډوال وژل شوي ول.
