چارواکي وایي د افغانستان د ننګرهار ولایت په دور بابا ولسوالۍ کې یو بل ماشوم پولیو (ګوزن) وهلی دی.
په افغانستان کې د ملګرو ملتونو د ماشومانو چارو ادارې (یونېسېف) یو چارواکي له رسنیو سره یې د خبرو اجازې نه لرلو له کبله د نوم نه ښوولو په شرط مشال راډیو ته وویل چې له دې سره په هغه هېواد کې سږ کال د پولیو پېښو شمېر پینځه ته ورسېد.
دی وايي، تر دې مخکې یې څلور نورې پېښې هم په ننګرهار ولایت کې ثبت کړې دي.
د چارواکي په خبره، د طالبانو حکومت په ننګرهار او کندهار کې د پولیو واکسیني کیمپېن مخه نیولې ده.
چارواکي وویل، ټاکل شوې وه چې د جون پر ۱۲مه په ننګرهار کې د ګوزن ضد واکسینو کمپاین پیل کړي خو اجازه ور نه کړل شوه.
طالبانو لا د یونېسېف د چارواکي څرګندونو په اړه څه نه دي ویلي او دا یې هم نه دي ویلي چې ولې یې په هغو دوو ولایتونو کې د واکسیني کیمپېن اجازه نه ده ورکړې.
تر دې مخکې، په ۲۰۲۲ز کال کې په افغانستان کې د ګوزڼ دوه پېښې ثبت شوې وې.
افغانستان او پاکستان یوازیني هېوادونه دي چې لا هم پکې د پولیو وایرس موجود دی چې پکې شاوخوا هر کال ماشومان په ګوزڼ اخته کېږي.
