تمه ده چې د شانګهای د همکارۍ د سازمان په مجازي غونډه کې چې نن ( د جولای پر څلورمه) د هند په کوربه توب جوړېږي د افغانستان پر مسایلو هم بحث وشي.
د هندي رسنیو د راپورونو له مخې له منځنۍ اسیا سره د هند اتصال او د افغانستان وضعیت هغه مسایل دي چې په دې سرمشریزه کې د بحث لپاره نوې ډیلي ته لومړیتوب لري.
د نننۍ انلاین غونډې مشري به د هند وزیراعظم نریندرا مودي کوي.
د راپورونو له مخې چین، روسیه، قزاقستان، قرغزستان، تاجکستان، ازبکستان، هند او پاکستان چې د شانګهای د همکارۍ سازمان اصلي غړي دي او څارونکي غړي یې ایران، بېلاروس او منګولیا دې سرمشریزې ته بلل شوي، خو افغانستان چې د دې سازمان څارونکی غړی دی، تراوسه نه دی وربلل شوی. په دې غونډه کې د پاکستان وزیراعظم شهباز شریف هم په ان لاین ډول ګډون کوي.
