د پاکستان د کرکټ ملي لوبډلې سري لنکا ته په لومړۍ ټېسټ سیالۍ کې په څلورو وېکټو ماتې ورکړې ده.
د جولای پر ۲۰مه د سري لنکا په ګال لوبغالي کې د سیالۍ پر پینځمه او وروستۍ ورځ پاکستانۍ لوبډلې د ۱۳۱ منډو هدف د شپږو لوبغاړو په سوځېدو پوره کړ.
د ټېسټ سیالۍ په لومړۍ پاڼۍ کې سري لنکايي لوبډله د ۳۱۲ منډو په جوړولو سوځېدلې وه. د هغې په ځواب کې پاکستانۍ لوبډلې ۴۶۱ منډې جوړې کړې.
کوربه سري لنکا په دویمه پاڼۍ کې ۲۷۹ منډې جوړې کړې او پاکستان ته یې د ۱۳۱ منډو هدف ورکړ.
ټاکل شوې چې دواړو لوبډلو ترمینځ د ټېسټ لوبلړۍ دویمه او وروستۍ سیالي د جولای پر ۲۴مه په کولمبو کې پیل شي.
