په پېښور کې د امریکا د قونسلګرۍ د عامه اړيکو چاوراکې مونېکا ډېوېس د خیبر پښتونخوا په مانسهره کې د تعلیمي او چاپېریال ساتنې په پروګرامونو کې ګډون کړی دی.
د امریکا قونسلګرۍ د جولای پر ۲۰مه په بیان کې ویلي دي چې ډېوېس د جولای پر ۱۹مه مانسهرې ته ورغله او هلته یې د امریکا په مرسته په جوړو شویو غونډو کې د ګډون ترڅنګ یوشمېر پروژې هم ولیدې.
په بیان کې راغلي چې نوموړې په هزاره پوهنتون کې هغه تعلیمي څانګه، تالار او کتابتون ولیدل چې د امریکا په مالي مرسته یې ودانۍ جوړې شوې دي.
مونېکا ډېوېس داراز په پوهنتون کې د لرغونپوهنې یا ارکیالوژۍ د یو میوزییم پرانیسته هم وکړه.
په پېښور کې د امريکا قونسلګرۍ په خبرپاڼه کې راغلي چې له یوې ناحکومتي ادارې سره په ګډه په مانسهره کې د چاپېریال ساتنې په اړه د پوهاوي خپرولو هڅې هم کوي.
بیان وايي، هغه ناحکومتي اداره د چاپېریال ساتنې، ونو کښېنولو پر ارزښت او د پلاسټیک استعمال تاوانونو په اړه د پوهاوي غونډې هم کوي.
بیان زياتوي چې امريکا د خيبر پښتونخوا په مانسهره کې د تعليم ودې او ماحول ساتنې لپاره کار کوي.
