د پاکستان وفاقي حکومت ویلي دي چې د محرم په لومړۍ عشره کې د امنیت په موخه په څلورواړو صوبو، اسلام اباد او د هېواد تر واک لاندې ګلګت بلتستان کې پوځي سرتېري ځای پر ځای کوي.
د پاکستان دولتي راډیو وايي، د کورنیو چارو وزارت پرون (د جولای پر ۲۰مه) په یو امر کې ویلي دي چې دا اقدام د صوبايي حکومتونو په غوښتنه کوي.
د راډیو په وینا، پوځي سرتېري به د امنیت ټینګښت په برخه کې له ملکي انتظامیو سره مرسته کوي.
دا په داسې حال کې ده چې د جولای پر ۲۰مه په پاکستان کې د هجري قمري کال لومړۍ میاشت محرم پیل شوه او ټاکل شوې چې د جولای پر ۲۸مه او ۲۹مه د هغه هېواد اهل تشیع ماتمي غونډې او لاریونونه وکړي.
د نړۍ شیعه ګان هر کال د محرم په لومړیو ۱۰ ورځو کې په کربلا کې د اسلام د پیغمبر د لمسي امام حسین او د هغه د کورنۍ د غړو د وژنې په مناسبت ماتم کوي.
د پاکستان حکومت د جولای پر ۲۸مه او ۲۹مه په هېواد کې عامه چوټي یا رخصتي اعلان کړې ده.
