اروپايي ټولنې د طالبانو د حکومت د درو لوړپوړو چارواکو په ګډون د یوشمېر هېوادونو پر ۱۸ کسانو بندیزونه لګولي دي.
ټولنې د جولای پر ۲۰مه په یو بیان کې وویل چې هغه کسان په افغانستان، جنوبي سوډان، مرکزي افریقايي جمهوریت، اوکراین او روسیې کې د بشري حقونو د سرغړونو په تور د محدودیتونو په نوملړ کې شاملوي.
اروپايي ټولنې پر خپله ویبپاڼه د بندیزونو په نوملړ کې د طالبانو د حکومت د پوهنې سرپرست وزیر حبیب الله اغا، د عدلیې سرپرست وزیر عبدالحکیم شرعي او د سترې محکمې مشر قاضي عبدالحکیم حقاني نومونه شامل کړي دي.
رویټرز اژانس وايي، پر هغو چارواکو د نجونو او ښځو د حقونو په سرغړونو کې د ښکېلتیا په تور بندیزونه لګېدلي دي چې ورسره سم، هغوی اروپايي ټولنې ته سفر او د ټولنې په غړو هېوادونو کې کاروبارونه نه شي کولای او که هلته شتمنۍ لري نو هغه به کنګلېږي.
د طالبانو حکومت لا د ټولنې تازه اقدام په اړه څه نه دي ویلي.
اروپايي ټولنې تر دې مخکې هم د طالبانو پر حکومت او یوشمېر چارواکو بندیزونه لګولي دي.
