نن د جولای پر ۲۶مه په برسلز کې د نوې جوړې شوې ناټو ـ اوکراین د شورا د پرانیستې په غونډه کې د تور سمندرګي پر امنیت خبرې کېږي.
دا په داسې حال کې ده چې د اوکراین په خارکیف سیمه کې د روسيو او او اوکراینیو عسکرو ترمینځ جګړه سخته شوې ده. په دغه سیمه روسيو عسکرو حملې زیاتې کړې دي.
د برسلز په غونډه کې د ناټو هېوادونو سفارتکاران ګډون لري.
په غونډه کې د تور سمندرګي له لارې د اوکراینۍ غلې د لېږد پر هغه تړون هم خبرې کېږي چې روسیې یې له غځولو انکار کړی دی. مسکو په وروستیو کې د اوډیسا پر بندر او ډینیوب سیمه کې د اوکراین د غلې د لېږلو پر نظام حملې زیاتې کړې دي.
بلخوا د اوکراین ولسمشر وولودمیر زېلېسنکي ویلي د نن ورځې د ناټو او اوکراین د شورا له غونډې وړاندې یې د تور سمندرګي او د خپلو بندرونو پر امنیت او د غلې پر لېږد خبرې کړي دي.
د ناټو ـ اوکراین شورا په داسې حال کې جوړېږي چې په ناټو اېتلاف کې د اوکراین د غړیتوب په اړه تر اوسه کومه واضحه لاره نه ده ټاکل شوې.
