د ناټو اېتلاف ملګرو او اوکراین د تور سمندرګي له لارې د غلو برامد له موافقې څخه د روسیې وتل غندلي دي.
دوی د جولای پر ۲۶مه وویل چې روسیه په لوی لاس هڅه کوي چې د اوکراینیو کرنیزو برامداتو (صادراتو) مخه ونیسي.
په برسلز کې د ناټو-اوکراین شورا تر غونډې وروسته په اعلامیه کې راغلي چې متحدین داراز، د اوکراین پر اودېسا، مېکولایېف او د ناټو غړي رومانیا ته د نېږدې دانیوب سیند پر غاړه په رېني کې د اوکراین د غلو د ګودامونو په ګډون پر نورو بندري ښارونو د روسیو ځواکونو د توغندیو او ډرون الوتکو بریدونه غندي.
د ناټو-اوکراین شورا د کړکېچنو حالاتو پر مهال د نظریاتو شریکولو او تر هغو چې اوکراین د غړیتوب شرطونه پوره کوي، ورسره د نېږدې همکاریو لپاره جوړه شوې ده.
اوکرایني ولسمشر وولودیمیر زېلېنسکي تر هغې وروسته د هغې شورا د غونډې غوښتنه کړې وه چې تېره اوونۍ روسیې د تور سمندرګي له لارې د اوکراینیو غلو د خوندي لېږد له موافقې څخه د وتلو پرېکړه وکړه.
