د اېټالیا ساحل ساتونکی ځواک وايي، له لمپادوسا ټاپو سره نېږدې د کډوالو د دوو کښتيو تر ډوبېدو وروسته یې د پېښې له ځایه دوه مړي او ۵۷ کسان ژوندي ایستلي دي.
د راپورونو له مخې د پېښې په ځای کې ۳۰ نور کسان ورک دي چې لټون یې روان دی.
ساحلي ځواک د اګست پر شپږمه دا بیان تر هغې يوه ورځ وروسته ورکړی چې له تيونسه اروپا ته د تلونکو کډوالو دوه کښتۍ په سمندر کې چپه شوې.
رويټرز اژانس وايي چې په يوه کښتۍ کې ۴۸ او په بله کې ۴۲ کسان سپاره ول.
د جون پر ۱۴مه په يونان کې د کډوالو يوه کښتۍ ډوبه شوې وه چې خواوشا ۷۵۰ کسان پکې سپاره ول. په هغوی کې شاوخوا ۳۰۰ کسان ووژل شول چې ګڼ پاکستانيان هم پکې ول.
