امریکا وايي، که روسیه له شمالي کوریا سره د وسلو تړون کوي نو دا به د ملګرو ملتونو د قراردادونو سرغړونه وي.
د امریکا د بهرنیو چارو وزارت ویاند وېدانت پټېل د اګست پر ۱۵مه وویل چې د شمالي کوریا او روسیې ترمینځ هر ډول امنیتي همکاري او د وسلو تجارت به په څرګند ډول، د ملګرو ملتونو د امنيت شورا د پرېکړه لیکونو خلاف وي.
ملګرو ملتونو پر شمالي کوريا د اټومي پروګرام له وجې یولړ بندیزونه لګولي دي.
د اګست پر ۱۵مه چې پیانګ یانګ یې د خپلواکۍ د ملي ورځې په توګه لمانځي، د روسیې ولسمشر ولاديمیر پوتین او د شمالي کوریا رهبر کېم جونګ اون ترمینځ په تبادله شویو پیغامونو کې دواړو خواوو د اړیکو د پراخوالي یادونه کړې وه.
وېدانت پټېل زیاته کړه چې روسیه پر اوکراین د خپلې جارحانه جګړې د ملاتړ لپاره د نړۍ پر ځینو تر ټولو ګوښه شویو هېوادونو، شمالي کوریا او ایران، تکیه کوي.
پټېل دا څرګندونې پیانګ یانګ ته د روسیې د دفاع وزیر سېرګې شویګو تر سفر وروسته کړې دي.
