په افغانستان کې د طالبانو حکومت د کورنیو چارو وزارت سرپرست سراج الدین حقاني ویلي چې په پاکستان کې د ناامنۍ وروستۍ پېښې د هغه هېواد کورنۍ ستونزې دي او باید په خپله یې حل کړي.
حقاني دا خبره د اګست پر ۲۱مه د افغانستان په جنوبي ولايت اروزګان کې خلکو ته کړې ده.
نوموړي زياته کړې، که پاکستان ستونزې د زور له لارې هواروي نو د افغانستان او پاکستان ولسونو ته به زیان ورسېږي.
حقاني همداراز ویلي چې د دوی حکومت له نړیوالې ټولنې سره سفارتي اړیکې غواړي.
د پاکستان په اړه د طالبانو د کورنیو چارو وزارت دا څرګندونې ډېره مخینه نه لري.
حقاني د ۲۰۲۱ز کال په وروستيو کې د پاکستانيو طالبانو او پاکستاني حکومت تر مينځ د خبرو منځګړیتوب هم کړی وو، خو اوس یې ویلي چې هغه مذاکرات په پاکستان کې د سیاسي بدلونونو له کبله نتیجې ته ونه رسېدل.
پاکستاني چارواکو په وروستیو کې په هغه هېواد کې د زياترو بریدونو پړه پر هغو وسلوالو اچولې چې د دوی په ادعا له افغان خاورې ور اوښتي یا یې بریدونه له افغانستانه پلان کړي دي. خو طالب چارواکو دا ډول تورونه په وار وار رد کړي دي.
