په جنوبي وزیرستان کې د نانوخېل مسيدو او سپېرکۍ وزیرو ترمینځ د ځمکې لانجې پر سر نښتو کې يو کس وژل شوی او دوه تنه زخميان دي.
د کوز جنوبي وزیرستان د پولیسو مشر فرمان الله د سېپتېمبر پر ۱۰مه مشال راډيو ته وويل چې دوه ورځنۍ نښتې اوس درېدلي او اوربند شوی دی. هغه زیاته کړه چې د بالاپتر ځمکې د ملکيت پر سر د لانجې د دايمي حل موندلو کوښښ کوي.
دا لومړی ځل نه دی چې په قبايلي ضلعو کې د ځمکو لانجو پر سر په شخړو کې ولسونه يو بل ته مرګژوبله اړوي. تر دې مخکې هم هلته ورته پېښې شوې دي.
د جولای په میاشت کې په کورمه کې د قبیلو ترمینځ د ځمکې لانجې پر تر شپږو ورځو پورې نښتې وشوې او درنه مرګژوبله یې واړوله. وروسته مخالفو خواوو د جرګې او چارواکو په موجودګۍ کې د یو کلن اوربند موافقه لاسلیک کړه.
دا په داسې حال کې ده چې د نړیوال پرمختګ لپاره د امریکا نړیوالې ادارې (یو اېس اې ای ډي) د خیبر پښتونخوا په قبایلي ضلعو کې د ځمکو د رجسټرولو او کمپیوټري کولو لپاره د هغې صوبې له حکومت سره موافقه لاسلیک کړې ده.
د جولای پر ۱۳مه په پېښور کې د امریکا سفیر ډانلډ بلوم د خیبر پښتونخوا د امدن او ګټو ادارې له چارواکو سره موافقه لاسلیک کړه چې له مخې یې یو اېس اې ای ډي په قبایلي ضلعو کې د ځمکو د رېکارډ رسمي کولو په لړ کې مرسته کوي.
