پولیس وايي، په کراچۍ کې وسلوالو د یوې مدرسې مشر ویشتلی دی.
د پولیسو یو مشر عرفان بهادر په بیان کې ویلي دي چې د سېپټېمبر پر ۱۲مه پر موټرسایکل سپرو وسلوالو په ګلستان جوهر سیمه کې پر مولانا ضیا الرحمان ډزې وکړې او هغې یې وواژه.
د پولیسو په خبره، نوموړی په هم هغه سیمه کې د جامعه اسلامیه ابوبکر مشر وو.
تر اوسه معلومه نه ده چې مولانا ضیا الرحمان چا او ولې وژلی دی او ورباندې د برید ذمه واري هم چا نه ده منلې.
خو پولیسو په بیان کې زیاته کړې ده چې د پېښې پلټنې یې پیل کړې دي.
په کراچۍ کې تر دې مخکې هم پر دیني عالمانو او ملایانو بریدونه شوي دي.
د ۲۰۱۹ په مارچ کې د نومیاتي مذهبي عالم مفتي تقي عثماني د ګاډو پر کاروان په وسلوال برید کې د هغه دوه ساتونکي وژل شوي ول او دوه ولسي وګړي ژوبل شوي ول. خو عثماني له هغه بریده روغ وتلی وو.
