د افغانستان لپاره د امریکا سفارت چې له قطر څخه فعالیت کوي، په افغانستان کې د ټولشموله حکومت غوښتنه کړې ده.
د سېپتېمبر پر ۱۵ مه، د ډیموکراسۍ د نړیوالې ورځې په مناسبت هغه سفارت پر اېکس خپور کړي پیغام کې وویل چې په افغانستان کې باید حکومت د خلکو استازیتوب وکړي.
په پیغام کې راغلي چې د ټولشموله حکومت رامینځته کېدل د دې سبب کېږي چې د هر افغان غږ واورېدل شي.
په تېرو څه باندې دوو کلونو کې چې طالبانو کابل نیولی دی، هېڅ هېواد د دوی حکومت په رسمیت نه دی پېژندلی او ګڼو هېوادونو د ټولشموله حکومت غوښتنه کړې ده.
بلخوا طالب چارواکي وايي، په افغانستان کې یې په سرپرست حکومت کې د ټولو قومونو خلک شته نو ځکه ټولشموله دی.
