د اېټالیا ساحل ساتونکی ځواک وايي، د کډوالو په يوه بېړۍ کې یې تر اور لګېدو وروسته ۱۷۷ کسان ژغورلي دي.
چارواکي وایي، په ژغورل شویو کې ۲۷ د بېړۍ کارکوونکي او ۸۳ هغه کډوال دي چې له لمپادوسا څخه لېږدول کېدل.
هغه بېړۍ د اېټاليا له لمپادوسا ټاپو څخه د سېسلي سیمې پورتو امپېدوکلې ښار پر لوري روانه وه چې د سېپټېمبر پر ۳۰مه پکې اور ولګېد.
دا په داسي حال کې ده چې د اګست پر پینځمه د اېټالیا په سمندرګي کې له تيونسه اروپا ته د تلونکو کډوالو دوه کښتۍ چپه شوې چې پکې ۹۰ کسان سپاره ول. په هغه پېښه کې دوه تنه وژل شوي ول.
داراز، د جون پر ۱۴مه په يونان کې د کډوالو يوه کښتۍ ډوبه شوې وه چې خواوشا ۷۵۰ کسان پکې سپاره ول. په هغه پېښه کې شاوخوا ۳۰۰ کسان ووژل شول چې ګڼ پاکستانيان هم پکې ول.
د اېټالیې وزیراعظمې جورجیا مېلوني په سېپټېمبر کې پر اروپايي ټولنې غږ وکړ چې دناقانونه کډوالو د ورتګ د مسلې په هواري کې دې ورسره مرسته وکړي.
د سېپټېمبر له ۱۱مې څخه تر ۱۴مې پورې له شمالي افریقا څخه په ۱۹۹ کښتیو کې ۸،۵۰۰ ناقانونه کډوال د پناه اخیستو لپاره د لمپادوسا ټاپو ته رسېدلي ول او چارواکي وايي چې هغه شمېر د ټاپو له خپلې ابادۍ زیات دی.
هغه مهال د اېټالیا د سره صلیب ادارې ویلي ول چې په ټاپو کې د کډوالو په ۴۰۰ مرکزونو کې شاوخوا ۱،۵۰۰ کډوال پراته دي.
د فرانسې خبري اژانس وايي، سږ کال له شمالي افریقا څخه اېټالیې ته پر لاره څه باندې ۲،۰۰۰ کډوال په اوبو کې د ډوبېدو له کبله مړه شوي دي.
