د پنځوس اووره نړيوال جام په روانو سیاليوو کې پاکستان سري لنکا او انګليند بنګله دېش ته ماتې ورکړه.
د اکتوبر پر لسمه د هند په حیدراباد کې شوې د ورځې په دوهمې سیالۍ کې د پاکستان په وړاندې، لومړی بېټينګ سري لنکا وکړ او د ۹ لوبغاړو په اوټ کېدو یې ۳۴۴ منډې وکړي. پاکستان دا هدف په ۴۸ اوور کې د ۴ ويکټو په زیان پوره کړ.
د پاکستان لخوا تر ټولې ډېرې منډې محمد رضوان وکړي چې ۱۳۱ وې. هغه د لوبې غوره لوبغاړی اعلان شو.
پاکستان تر دې مخکې د دې جام په خپلې لومړۍ سیالۍ کې نيدرلېنډز ته ماتې ورکړې وه. سري لنکا خپله لومړۍ لوبه جنوبي افریقې ته بایللې وه.
د اکتوبر پر لسمه په يوه بله سیالۍ کې انګلېنډ بنګله دېش ته ماتې ورکړه. په درمشالا کې شوې دغې سیالۍ کې لومړی بېټينګ انګلېنډ وکړ او د ۹ لوبغاړو په اوټ کېدو یې ۳۶۴ منډې وکړي. د بنګله دېش ټول لوبغاړي د ۲۲۷ منډو په کولو سره په ۴۹م اوور کې اوټ شول.
په هند کې روان د سږني نړیوال جام په سیالیو کې به د اکتوبر پر ۱۱مه، افغانستان د هند سره لوبه کوي. افغانستان خپله لومړۍ لوبه بنګله دېش ته بایللې. هند د دې جام خپله لومړۍ لوبه د اسټراليا خلاف وکړه او بریا یې خپله کړه.
په دې ټورنمنټ کې ۱۰ لوبډلې برخه اخلي او پایلوبه به یې د نومبر پر ۱۹مه کېږي. په لومړي پړاو کې هره لوبډله له نورو لوبډلو سره سیالي کوي او په پای کې به د سر څلور لوبډلې نيمه پايلوبې او بيا وروسته به دوه لوبډلې پايلوبې ته لاره مومي.
