د ملي جمهوري غورځنګ د زده کوونکو سازمان "نېشنل سټوډنټس موومنټ" يا اېن اېس اېم د بې اسناده افغان کډوالو د ایستلو پر ضد مظاهره کړې ده.
د اکتوبر پر ۱۲مه په پېښور پوهنتون کې شوې دې احتجاجي مظاهرې کې د زرعي پوهنتون او اسلامیه کالج پوهنتون لسګونو زده کونکو هم برخه اخيستې وه.
د مظاهرچيانو په وينا د پاکستان په ګوټ ګوټ کې د افغان کډوالو د "ځورولو" لړۍ روانه ده چې هغوی یې "غندنه" کوي.
د مظاهرې یو منتظم ډاکټر ريحان خان د اکتوبر پر ۱۲مه مشال راډیو ته وویل چې د پاکستان حکومت دې د هغوی په وینا له افغان کډوالو سره "غیرقانوني او غیرانساني" رویه بنده کړي.
د عاطف رشید په نوم د مظاهرې یو بل ګډونوال وویل، په افغانستان کې د نجونو پر تعلیم بندیز دی نو د پاکستان حکومت دې له افغان نرینه او ښځینه زده کوونکو سره له نرمۍ کار واخلي او د هغوی راتلونکی دې نه خرابوي.
د پاکستان نګران حکومت د افغانانو په ګډون ټولو بې اسناده بهرنيانو ته د اکتوبر تر پایه له هغه هېواده د وتلو امر کړی دی.
