د پېښور په مترا کې د وسلوالو په ډزو کې یو پولیس سرتېری وژل شوی او یو ولسي وګړی ژوبل دی.
د ښار پولیسو د اکتوبر پر ۱۸مه تر پېښې وروسته په بیان کې ویلي دي چې سرتېری له خپل یوه ملګري سره پر موټرسایکل سپور وو او له پیر بالا چوک څخه روان وو چې وسلوالو ورباندې ډزې وکړې.
بیان وايي، هغه سرتېري د رېګي په تاڼه کې دنده ترسره کوله.
پر سرتېري د برید ذمه واري لا چا نه ده منلې خو پولیس وايي چې پلټنې یې پیل کړې دي.
دا په داسې حال کې ده چې له تېرو شاوخوا دوو کلونو راهیسې د خیبر پښتونخوا په بېلابېلو برخو کې پر پولیسو او امنیتي ځواکونو بریدونه زیات شوي دي.
د خیبر پښتونخوا د پولیسو د مرکزي دفتر په وینا، په ۲۰۲۲ز کال کې په صوبه کې په ۱۵۱ بریدونو کې ۱۰۵ سرتېري او افسران وژل شوي ول.
