د خيبر پښتونخوا په ډېره اسماعيل خان کې په دوو بېلو چاودنو کې شپږ کسان وژل شوي او ۲۴ نور ژوبل شوي دي.
د نومبر پر درېيمه لومړۍ چاودنه په ټانک اډه سيمه کې د پوليسو ګاډي ته نېږدې وشوه چې پکې پينځه عام وګړي ووژل شول او د دوو پوليسو په ګدون ۲۴ ژوبل شول.
د ډېره اسماعيل خان د پوليسو مشر عبدالرووف بابر قيصراني مشال راډيو ته وويل چې په چاودنه کې پينځه ولسي وګړي وژل شوي او ۲۲ ژوبل شوي دي. د نوموړي په وينا د چاودنې په نتيجه کې دوه پوليسان هم ژوبل شوي دي.
پولیس زياتوي، پېښه په ټانک اډه کې د ريموټ کنټرول له لارې په يو موټر سايکل کې د ځای پر ځای شويو بارودي موادو چاودېدو په نتيجه کې رامينځ ته شوې ده.
دويمه چاودنه په کلاچۍ سيمه کې د پوځ ګاډي ته نېږدې وشوه چې د پوليسو په وينا يو پوځي پکې ووژل شو.
تر دې مهاله د چاودنو ذمه واري چا نه ده منلې.
د روان ۲۰۲۳ز کال له اوړي راهیسې د خیبر پښتونخوا په یوشمېر برخو کې د ناامنۍ پېښې زیاتې شوي دي چې د ولسي خلکو په ګډون پکې امنیتي سرتېرو ته زیانونه اوښتي دي. د پاکستان حکومت او پوځ وايي، د وسلوالو پرضد یې هدفي عملیاتو ته دوام ورکړی دی.
د سېپټېمبر پر ۳۰مه په اسلام اباد کې د څېړنو او امنیتي مطالعاتو مرکز په خپل تازه رپورټ کې وویل چې د ۲۰۲۳ز کال په لومړیو نهو میاشتو کې په پاکستان کې امنیتي ځواکونو ته دومره مرګژوبله اوښتې ده چې په تېرو اتو کلونو کې یې ساری نه لیدل کېږي.
