روسیې ویلي دي چې له خپل یوه اوبتله یې د اټومي وسلو وړونکي بین البراعظمي بیلېسټېک توغندي بریالۍ ازموینه کړې ده.
د روسیې د دفاع وزارت د نومبر پر پینځمه په بیان کې وویل چې د بولاوا په نوم توغندی یې "د پاچا الېکساندر درېیم په نوم له اوبتله توغولی دی."
د وزارت په وینا، بولاوا سمندري بین البراعظمي بیلېسټېک توغندی دی.
دا په داسې حال کې ده چې روسیې د اټومي وسلو پر ازموینو د بندیز له مهمې موافقې څخه تر وتلو وروسته د اټومي وسلو په اړه لفاظي او بیانونه زیات کړي دي.
وزارت ویلي دي چې بولاوا توغندی یې د روسیې په شمال لویدیځ کې د سپین سمندرګي له ساحله زرګونه کېلومیټره لیرې په ختیځ کې په کمچاتکا ټاپووزمه کې د هدف پر لوري ویشتی دی.
د رسنیو په وینا، بولاوا توغندی ۱۲ میټره اوږد دی چې څه باندې ۸،۰۰۰ کېلومیټره لیرې هدف ویشتلی شي.
