د شمالي وزیرستان بې کوره شوي خلک وايي، حکومت ورسره د پرلت ختمولو لپاره د غوښتنو پوره کولو ژمنې کړې وې، خو نه یې پوره کوي.
د شمالي وزیرستان د کډوالو د کمېټۍ مشر ملک رحمت غلام د نومبر پر نهمه مشال راډیو ته وویل، د انتظامیې په ډاډ یې احتجاج ختم کړی وو خو دوه اوونۍ وشوې چې لا هم د کډوالو میاشتنۍ مرسته نه ده بحال شوې.
ده وویل، بې کوره خلک له ډېرو مشکلاتو سره مخامخ دي او حکومت باید ورباندې "رحم" وکړي.
د ده په وینا، که حکومت له څلورو میاشتو بندې کړې نغدې مرستې نه شي ورکولای نو هغه خلک دې په شوال او دته خېلو کې خپلو سیمو ته ستانه کړي.
د شمالي وزیرستان هغو بې کوره شویو خلکو د اکتوبر له ۱۳مې تر ۲۰مې نېټې پورې په بکاخېلو کې پرلت وهلی وو.
په خیبر پښتونخوا کې د طبیعي ناورینونو پر وړاندې د مبارزې ادارې (پي ډي اېم اې) د بې کوره شویو خلکو د چارو ویاند احسان داوړ مشال راډیو ته وویل چې هغه مرستې یې د پیسو نه شتوالي له کبله درولې دي چې ډېر ژر به بحالې شي.
د شمالي وزیرستان مرستیال کمېشنر منظور اپرېدي د نومبر پر نهمه مشال راډیو ته وویل چې د هغو خلکو ستنولو لپاره خبرې او هلې ځلې روانې دي.
د شمالي وزیرستان هغه اوسېدونکي په ۲۰۱۴ز کال کې د پاکستاني پوځ د ضرب عضب عملیاتو له کبله بې کوره کړل شوي ول.
