د پاکستان د لوړو زده کړو ادارې - هایر ایجوکیشن کمیشن - د افغان زده کوونکو لپاره د علامه محمد اقبال سکالرشپ بحال کړی دی.
د یادې ادارې له خوا د نومبر پر ۱۷ نیټه مشال راډيو ته په لېږل شوې خبرپاڼه کې ویل شوي چې د افغان زده کوونکو لپاره یې د علامه محمد اقبال سکالرشپ پروګرام دریم پړاو بحال کړی دی.
په خبرپاڼه کې ویل شوي چې زده کوونکي د دې سکالرشپ لپاره د نومبر تر ۳۱مې درخواستونه ورکولای شي.
خبرپاڼې زیاته کړې چې دا ځل به هم لږترلږه ۴۵۰۰ افغان زده کوونکو ته د پاکستان په بېلا بېلو کالجونو او پوهنتونونو کې داخلې ورکړل شي.
په دې کې د طب انجنیرنګ ، زراعت ، منیجمنټ او کمپیوټر ساینس شعبې شاملې دي.
