د مهاجرت نړیوال سازمان (ای او اېم) ويلي دي چې د لیبیا له ساحل سره نېږدې د يوې کښتۍ چپه کېدو په پېښه کې د ښځو او ماشومانو په ګډون ۶۱ کډوال ډوب شوي دي.
سازمان د ډېسېمبر پر ۱۶مه، په اېکس پاڼه د ژغورل شویو کسانو په حواله ليکلې دي چې په کښتۍ کې شاوخوا ۸۶ تنه سپاره ول او د ليبيا له زواره ښاره روانه شوې وه.
سازمان په دې ترڅ کې نور معلومات نه دي ورکړي.
دا په داسي حال کې ده چې د اګست پر پینځمه د اېټالیا په سمندرګي کې له تيونسه اروپا ته د تلونکو کډوالو دوه کښتۍ چپه شوې وې چې پکې ۹۰ کسان سپاره ول. په هغه پېښه کې دوه تنه وژل شوي ول.
داراز، د جون پر ۱۴مه په يونان کې د کډوالو يوه کښتۍ ډوبه شوې وه چې خواوشا ۷۵۰ کسان پکې سپاره ول. په هغه پېښه کې شاوخوا ۳۰۰ کسان ووژل شول چې ګڼ پاکستانيان هم پکې ول.
