د پاکستان سپريم کورټ (ستر عدالت) د پخواني چيف جسټس (مشر قاضي) ثاقب نثار پر کور د لاسي بم په بريد کې دوه پوليس ژوبل شوي دي.
د پنجاب پوليسو د ډېسېمبر ۲۰مې پر ماښام تر پېښې وروسته په بیان کې وویل وسلوالو د لاهور په ګارډن ټاون سيمه کې د قاضي نثار پر کور د لاسي بم بريد وکړ چې پکې نوموړي او د هغه د کورنیو غړو ته زیان نه دی اوښتی خو دوه پولیس ساتونکي یې برسېرن ټپي شوي دي.
بیان وايي چې بريد د کور پر ګراج (ګیراج) شوی او هغه مهال پخوانی مشر قاضي او د هغه د کورنۍ غړي په کور کې موجود ول.
تر اوسه چا د بريد مسووليت نه دی منلی.
د پنجاب پوليسو په بیان کې ویلي چې د لومړنیو پلټنو له مخې دا په پاکستان کې د وېرې او ترهې خپرولو لپاره د هغه "هېواد ضد کسانو" یوه "ناوړه هڅه" ده.
د پنجاب د پوليسو مشر ډاکټر عثمان انور د پيښي نوټس اخيستی او په دې اړه يې له اړونده چارواکو رپورټ غوښتی دی.
ثاقب نثار، چې د ۲۰۱۶ز کال د ډېسېمبر پر ۳۱مه يې د پاکستان سپريم کورټ د چيف جسټس په توګه لوړه کړې وه، د ۲۰۱۹ز کال د جنورۍ پر ۱۷مه تقاعد شو.
