د بلوچستان په پښتون مېشته سیمه دوکۍ کې د سکرو په یو کان کې د زهرجن ګېس له کبله درې کان کیندونکي مړه شوي دي.
د دوکۍ ضلعې مرستیال کمشنر دوست محمد ناصر د جنورۍ پر ۲۰ مشال راډیو ته وویل په مړو کې د نعمت الله او حیات الله په نامه دوه وروڼه دي چې د افغانستان اوسېدونکي دي او یو بل تن زین الله نومېږي.
دوست محمد ناصر زیاته کړه چې د افغانستان د کسانو مړي یې په روغتون کې تر ضروري کارروايي وروسته خپل هیواد ته لېږدولي دي.
په کوټه کې د پاکستان د کویلې د مزدورانو اتحادیې مشر سلطان لالا مشال راډیو ته وویل چې په ۲۰۲۳م کال کې د بلوچستان د سکرو یا کویلې په کانونو کې ۵۱ پېښې رامنځ ته شوې وې چې له امله یې ۶۹ مزدورانو ژوند له لاسه ورکړی وو.
