مصریو چارواکو ویلي دي چې په غزې تړانګه کې د اوربند او د یرغمل شویو اسراییليانو د خوشې کولو په اړه یې له حماس، چې امریکا او اروپايي ټولنه ترهګره ډله بولي، سره مذاکراتو څه نتیجه نه ده ورکړې.
چارواکو د مارچ پر پینځمه له حماس سره تر درې ورځنيو مذاکراتو وروسته وویل چې په هغو خبرو کې څه پرمختګ و نه شو.
دا په داسې حال کې ده چې امریکا او ځینې نورو هېوادونه له اسراییلو او حماسه غوښتنه کړي چې د روژې تر پیلېدو مخکې دې د اوربند پر موضوع موافقه وکړي. امکان دی چې سږ کال روژه د مارچ پر ۱۰مه پیل شي.
د ۲۰۲۳ز کال له اکتوبر راهیسې روانې جګړې د غزې ډېره برخه ویجاړه کړې او په ځانګړې توګه په شمالي برخو کې یې بشري ناورین زېږولی دی. د دې له وجې زیاتره خلک د ژوندي پاتې کېدو لپاره د خوړو په لټه کې دي.
اسراییلو د اکتوبر پر اوومه د حماس د برید په غبرګون کې په غزې تړانګه کې سختې پوځي کاروايۍ ته دوام ورکړی دی.
په غزه کې روغتیايي چارواکي وايي، په جګړه کې د وژل شويو فلسطينيانو شمېر تر ۳۰،۰۰۰ اوښتی دی چې زياتره يې ښځې او ماشومان دي.
