په کورمه کې چارواکو د خرلڅیو لاره له افغانستان سره د تګ راتګ او سوداګرۍ لپاره تر څه ساعت پورې تر تړلو وروسته بیا پرانیستې ده.
د سوداګرو ټولنې مشر سید مبین حسین مشال راډیو ته وویل چې چارواکو هغه لاره د مارچ پر ۱۰مه سهار مهال وتړله خو بیا یې دوه ساعته وروسته پرانیسته.
امنیتي چارواکي او د سیمې اوسېدونکي وايي چې د مارچ پر نهمه هلته د پاکستان او د طالبانو د حکومتي سرتېرو ترمینځ ډزې وشوې.
دوی وايي، په پېښه کې د ملېشې ځواک دوه سرتېري ژوبل شول.
امنیتي او استخباراتي چارواکو د نوم نه ښوولو په شرط مشال راډیو ته وویل چې نښته پر یوې پوستې د طالبانو د حکومتي سرتېرو تر حملې وروسته پیل شوه.
په پکتیا کې د طالبانو د حکومت چارواکو لا پر ډېورنډ کرښه د هغې پېښې په اړه څه نه دي ویلي.
د مليخېلو یو اوسېدونکي هاشم علي د مارچ پر ۱۰مه مشال راډیو ته وویل چې د شنبې (خالي) پر ورځ ډزې سهار شاوخوا ۱۱ بجې پیل شوې چې تر شاوخوا دوو ساعتونو پورې روانې وې او د لویې وسلې اوازونه هم اورېدل کېدل.
د سیمې پولیس وايي چې د خرلڅیو لاره یې د یوې تخنیکي ستونزې له وجې تړلې وه او بیا یې پرانیسته.
په هغه سیمه کې تر دې مخکې هم نښتې او د تاوتریخوالي نورې پېښې شوې دي چې له کبله یې د خلکو تګ راتګ او دوه اړخیزه سوداګري اغېزمنه شوې ده.
