د امریکا بهرنیو چارو وزیر اینتني بلېنکن په غزه د بشري کړکېچ په اړه د سعودي عربستان له مشرانو سره ليدلي دي.
بلېنکن د مارچ پر ۲۰مه سعودي عربستان ته ورسېد او وروسته يې د سعودي ولیعهد شهزاده محمد بن سلمان او د هغه هېواد بهرنیو چارو وزیر فیصل بن فرحان سره ملاقات وکړ. نوموړي پر اېکس پاڼه ليکلي چې له دواړو مشرانو سره د غزې پر بشري کرکېچ او فلسطين ته په سمدستي توګه د مرستو لا زیاتولو پر هڅو وغږېده. دا په داسې حال کې ده چې په غزه کې د قحطۍ د ګواښ په اړه اندېښې ژورې شوې دي.
د فلسطينيانو خراب حالت او په غزه کې د برمته شويو اسرايلي وګړیو برخليک منځګړي هېوادونه اړ کړي دي چی یوځل بیا په قطر کی د خبرو اترو مېز ته کښېني چې اوربند ته د رسېدو لارې چارې ولټوي خو چارواکو تر اوسه په دې لړ کې لږ پرمختګ کړی دی.
د حماس، چې امریکا او اروپايي ټولنه یې ترهګره ډله بولي، او اسراییلو ترمينځ تر جګړې وروسته دا د بلېنکن منځني ختیځ ته شپږم سفر دی.
حماس د ۲۰۲۳ز کال د اکتوبر پر اوومه پر اسراییلو برید وکړ او شاوخوا ۱،۲۰۰ اسراييلي وګړي يې ووژل او۲۵۰ کسان یې یرغمل کړل.
تر اوسه یوشمېر یرغمل شوي د یو جوړ جاړي له لارې خوشې کړل شوي دي. اسراییلو د حماس د برید په غبرګون کې سختې پوځي کاروايۍ ته دوام ورکړی دی.
په غزه کې روغتیايي چارواکي وايي، په هغه جګړه کې د وژل شويو فلسطينيانو شمېر تر ۳۱،۰۰۰ اوښتی دی چې زياتره يې ښځې او ماشومان دي.
