د مسکو یو عدالت د مارچ پر ۲۴مه څلور کسان د کنسرټ پر هال یا تالار د برید په تړاو د ترهګرۍ فعالیت لپاره تورن کړي دي او هغوی یې د مقدمې تر بشپړې اورېدنې مخکې د دوو میاشتو لپاره زندان ته واستول.
د مارچ پر ۲۲مه په هغه برید کې د وژل شویو شمېر ۱۳۷ ته رسېدلی دی او د یکشنبې (اتوار) پر ورځ په روسیه کې ملي ماتم وو.
د مارچ پر ۲۴مه ګڼو خلکو د مسکو په کراسنوګورسک سیمه کې د برید له ځایه سره نېږدې ګلان کښېښودل او وژل شویو ته یې دعا وکړه.
دا په تېرو شاوخوا دوو لسیزو کې په روسیه کې تر ټولو خونړی برید بلل کېږي.
د باسماني ولسوالۍ عدالت ویلي دي چې هغه څلور تورن کسان مراد علي رجب علیزاده، دلېرجان مرزایېف، محمد صابر فیضوف فریدون شمس الدین نومېږي او ټول د تاجکستان وګړي دي.
عدالت ویلي دي چې له هغو څخه یې درو کسانو مرازیېف، رجب عليزاده او شمس الدین د خپل جرم اعتراف کړی دی.
هغه کسان په داسې حال کې عدالت ته وړاندې شول چې پر پړسېدلیو مخونو یې زخمونه او د وینې نښې ښکارېدې.
روسیو چارواکو د هغې حملې په تړاو د هغو څلورو تورنو په ګډون ۱۱ تنه نیولي دي.
اسلامي دولت (داعش) ډلې د هغه برید ذمه واري منلې ده.
