د اوکراین ولسمشر وولودیمیر زېلېنسکي وايي، که اوکراین د امریکا پوځي مرسته ترلاسه نکړي نو ځواکونه به یې پر شا لاړ شي.
امریکا له اوکراین سره د پوځي مرستو ژمنه کړې خو دا په کانګرس کې د سیاسي شخړو له امله تړل شوي دي.
زېلېنسکي د مارچ پر۲۹مه، واشنګټن پوسټ سره په یوه مرکه کې وویل چې که د امریکا ملاتړ نه وي نو دا په دې مانا ده چې هغوی به د هوايي دفاع، د پټریوټ توغندي د الیکترونیکي جګړې لپاره جیمرونه او ۱۵۵ ملي میتره توپخانه و نه لري.
دا مرکه د هغه لړۍ وروستۍ برخه ده چې زېلېنسکي د لویدیځو رسنیو سره ترسره کړی ترڅو کانګرس څخه وغواړي چې هغه مېلیاردونه ډالره پوځي مرستې منظوره کړي چې د بایډن ادارې یې شپږ میاشتې مخکې وړاندیز کړی وو.
زېلېنسکي د مارچ پر ۲۸مه، د امریکا د استازو جرګې له مشر مایک جانسن سره د تېلیفون له لارې خبرې وکړې ترڅو د د مهمو مرستو غوښتنه وکړي او زیاته یې کړه چې د کیېف د روسیې د مخ په زیاتېدونکي بریدونو د مخنیوي لپاره دغه مرستو ته اړتیا لري.
د امریکا سېنېټ تېره میاشت د اضافي لګښتونو قرارداد تصویب کړه چې له مخې یې اوکراین ته شاوخوا ۶۰ مېلېارده ډالر ځانګړې شوي خو جانسن دا قانوني مسوده د استازو په جرګه کې د رایې لپاره نه ده راوړې.
په جرګه کې ریپبلکن ګوند غواړي کانګرس دې ته اړ کړي چې د سرحدونو امنیت ته لومړیتوب ورکړي.
