د نړۍ سیاسي او سفارتي مشرانو په منځني ختیځ کې په جګړه کې د زیاتوالي وېره څرګنده کړې او په دې لړ کې یې پر زغم ټینګار کړی دی.
دا په داسې حال کې ده چې نړۍ د اسراییلو له خوا ایران ته د هغه بې ساري برید ځواب ورکولو ته شېیې شماري چې ایران د تېرې اونۍ په پای کې پر اسراییلو کړی وو.
د اروپايي ټولنې د بهرنۍ تګلارې مشر جوزف بورېل ویلي: "موږ د پاڼ یا کمر پر څنډه ولاړ یو او په کار ده چې له دې ځایه لرې شو."
د امریکا د ملي امنیت ویاند جان کربي ویلي، دوی له ایران سره جګړه او سیمه ییزه شخړه لیدل نه غواړي. خو د ده په وینا، دا پرېکړه کول د اسراییلو کار دی چې هغوی که ځواب ورکوي نو څنګه به یې ورکوي؟
د فرانسې، جرمني او بیلجېم په ګډون ګڼوهیوادونو د ایران سفیران ورغوښتي دي.
د فرانسې د بهرنیو چارو وزارت ویلي چې دوی له خپلو اتحادیانو سره پر دې کار کوي چې زیات شوی کړکېچ را کم کړي.
د روسي ولسمشر دفتر د اپرېل پر ۱۵مه ویلي چې د کړکېچ لا زیاتېدل د هیچا په ګټه نه دي. دوی غږ کړی دی چې له سیاسي او سفارتي لارې دې حل ولټول شي.
دا تر هغې وروسته ده ایران د اپرېل پر ۱۳مه ناوخته پر اسراييلو په پراخه کچه د بې پيلوټه الوتکو او توغنديو بې ساري بريدونه کړي دي.
هغه توغندي د اپرېل پر ۱۴مه سهار دوه بجې د اسراييلو هوايي حريم ته داخل شول خو د هغه هېواد هوايي دفاعي نظام يې مخه ونيوله.
د برید پر مهال د بیت المقدس په اسمان کې لویې چاودنې وشوې او د رڼا څراغونه لیدل کېدل.
اسراییلیو چارواکو يوې پوځي اډې ته د لږ زیان رسېدو او د يوې اووه کلنې ماشومې د شدید زخمي کېدو راپور ورکړی دی.
