په اسلام اباد کې د امریکا د سفارت او د پېښور د يوې شخصي تعليمي ادارې انسټيټيوټ اف مېنېجمېنټ ساينسز (ای اېم اېس) تر مینځ د "لېنکن کارنر" په نامه د تعليمي وظیفو(بورسونو) مودې غځولو لپاره ياداشت لاسلیک شوی دی.
د اپریل پر ۲۳مه د امریکا د سفارت لخوا په خپره شوې خبرپاڼه کې ويل شوي چې دا یاداشت په اسلام اباد کې د امریکا د سفارت د ولسي چارو د کونسلرې بینېټا مالون او د ای اېم اېس د مشر ډاکټر عثمان غني ترمينځ لاس لیک شوی دی چې له مخې یې د بورسونو موده د ۲۰۲۶ز کال تر اپرېل میاشتې پورې غځول شوې ده.
د پاکستان لپاره د لېنکن تعلیمي بورسونو لړۍ په ۲۰۱۴ز کال کې پیل شوې وه چې پکې یاد مرکز زده کوونکو ته د انګریزۍ ژبې د زدکړې تر څنګ د مسلکي مهارتونو د ودې ورکولو، لوړو زده کړو او د امریکا د کلتور او تاریخ په اړه د پروګرامونو کوربتوب کوي.
د یاد پروګرام تر چتر لاندې په ۲۰۲۳ز کال کې شاوخوا ۶۰ غونډې جوړې شوې وې چې پکې شاوخوا ۱۰،۰۰۰ زده کوونکو ګټه ترلاسه کړې وه.
د امریکا سفارت په پاکستان کې د لېنکن په نامه ۱۹مرکزونه لري. د امریکا سفارت په خیبر پښتونخوا کې د لنکن کارنر ترڅنګ د روزوویلټ په نوم یو بل مرکز د مېرمنو لپاره په شهید بېنظیر بوټو پوهنتون کې هم لري.
