حماس ویلي، څومره ژر چې ممکنه وي د مصر د تازه وړاندیز په غبرګون کې به یو پلاوی قاهرې ته واستوي چې پر اوربند خبرو ته دوام ورکړي.
د حماس، چې امریکا او اروپايي ټولنه یې ترهګره ډله بولي، یو مشر اسماعیل هنیه د مې پر دویمه په بیان کې وویل چې د مصر د استخباراتو له مشر سره یې خبرې وکړې او د اوربند د وړاندیز د مطالعه کولو په برخه کې یې د غورځنګ پر مثبتې روحیې ټینګار وکړ.
په بیان کې دا نه دي راغلي چې پلاوی به کله سفر کوي. د اوربند د وړاندیز له مخې به حماس په غزه کې د جګړې درېدو او هلته د اړینو مرستو لېږد په بدل کې یرغمل کسان خوشې کړي.
