وایټ هاوس (سپینې ماڼۍ) ويلي چې د امريکا مرستیاله ولسمشره کاملا هېريس او د ملي امنیت سلاکار جېک سولیوان به روانه میاشت په سویټزرلينډ کې د اوکراین د سولې په کنفرانس کې ګډون کوي.
دا له هغه وروسته ده چې کییف له امريکا، په ځانګړې توګه له ولسمشر جو بايډڼ څخه د جون پر ۱۵مه او ۱۶مه کېدونکي هغه کنفرانس کې د ګډون ښکاره غوښتنه کړې وه.
سپینې ماڼۍ د جون پر دریمه په یوه بیان کې وویل چې مرستیاله ولسمشره به "د اوکراین د حاکمیت او ځمکنۍ بشپړتیا او د ملګرو ملتونو د منشور د اصولو پر بنسټ د عادلانه او تلپاتې سولې د تامین لپاره د اوکراین د هڅو د ملاتړ په برخه کې د بایډن او هېريس د ادارې پر ژمنتیا ټینګار وکړي."
بيان زیاته کړې چې هېريس به "د اوکراین د خلکو ملاتړ یو ځل بیا تایید کړي ځکه چې هغوی د روسیې د روان تېري پر وړاندې د ځان دفاع کوي."
دا اعلان په داسې حال کې شوی چې د اوکراین ولسمشر وولوديمير زېلېنسکي له څو اونيو راهيسې له بایډن څخه غوښتنه کوله چې په دغه سرمشریزه کې ګډون وکړي چې لږترلږه ۱۰۷ هېوادونو خپل ګډون پکې تایید کړی دی.
