د پاکستان رويت هلال کمېټۍ اعلان کړی چې لوی اختر به د جون پر ۱۷مه نېټه لمانځل کېږي.
د رويت هلال کمېټۍ غړو د جون پر اوومه په کراچۍ کې د موسمياتو ادارې په مرکزي دفتر کې د ذوالحج مياشتې لېدو لپاره غونډه وکړه.
وروسته د کمېټې مشر محمد عبدالخبير ازاد خبرې غونډې ته وويل چې د خيبرپښتونخوا په ګډون د پاکستان له بېلابېلو سيمود مياشتې ليدو د شهادتونو ترلاسه کولو وروسته يې دغه اعلان وکړ.
بلخوا په افغانستان کې د طالبانو سترې محکمې هم اعلان کړی چې هلته به هم د جون په ۱۷ مه د لوی اختر لومړۍ ورځ وي.
دې محکمې تېره شپه په یوه اعلامیه کې ویلي، په مرکز او ولایتونو کې د دوی د هلال کمېټیو میاشت لیدلې ده.
سږکال هم خلک اختر په داسې حال کې لمانځي چې د افغانستان نیمايي برخه د وروستیو اورښتونو او سېلابونو له کبله زیانمنه شوې او خلک له اقتصادي ستونزو کړېږي.
د یادونې وړ ده چې د سعودي عرب حکومت د جون پر شپږمه اعلان وکړ چې د ذوالحج میاشت یې لیدلې او لوی اختر به د جون پر ۱۶مه لمانځل کېږي.
د عربي رسنیو ترمخه د حج لوی رکن وقوف عرفه به د جون پر ۱۵مه وي او لوی اختر به د جون پر ۱۶مه وي.
