پاکستانۍ رسنۍ وايي چې د افغانستان لپاره د پاکستان ځانګړی استازی اصف درانی به د دوحې په غونډه کې د هغه هېواد استازیتوب وکړي.
جیو نیوز او اې ار وای نیوز ټېلېوېژنونو پرون د جون پر ۲۷مه د سفارتي سرچینو په حواله وویل چې اسلام اباد پرېکړه کړې چې د قطر په پلازمېنه کې د ملګرو ملتونو په کوربه توب په درېیمه غونډه کې ګډون وکړي.
رسنیو زیاته کړې چې د لویدیزې اسیا لپاره د بهرنیو چارو د وزارت مرستیال سېکرټر به هم د پاکستان استازیتوب وکړي.
د طالبانو حکومت د دې میاشتې په پیل کې ویلي ول چې چارواکي یې د دوحې په ناسته کې ګډون کوي.
امریکا هم ویلي دي چې د جون له ۳۰مې پیلېدونکې دوه ورځنۍ غونډې ته خپل دوه استازي ټام وېسټ او رينا اميري استوي.
وېسټ د افغانستان د سولې او رينا اميري د افغان مېرمنو او بشري حقونو لپاره د امريکاد بهرنيو چارو وزارت ځانګړې استازې ده.
تر دې مخکې د ملګرو ملتونو په کوربه توب په دوحه کې د افغانستان په اړه دوه ناستې شوې دي چې ورڅخه یې لومړۍ ته د طالبانو استازي نه ول بلل شوي او په دویمه کې هغوی خپله ګډون نه وو کړی.
