فلسطینیو چارواکو ویلي چې د جولای پر ۱۰مه د غزې تړانګې په جنوبي برخه کې د اسراییلو په هوايي برید کې لږترلږه ۲۹ کسان وژل شوي دي.
د فلسطین د روغتیا چارواکي وايي، د غزې د خان یونس سیمې په عبسان سیمه کې په شوي برید کې د یو ښوونځي مخې ته د کډوالو خیمې په نښه شوې دي او د برید زیاتره قربانیان یې ښځې او ماشومان دي.
د چارواکو په وینا، د هغه ځای اوسېدونکي د حماس، چې امریکا او اروپايي ټولنه یې ترهګره ډله بولي، پر ضد د عملیاتو لا زیاتولو په لړ کې د اسراییلیو ټانکونو د ورتګ او ډزو له وجې له سیمې تښتېدلي دي.
دا په داسې حال کې ده چې حماس خبرداری ورکړی چې د دې کاروایانو له کبله د اوربند خبرې اترې له خطر سره مخامخېدلای شي.
په همدې حال کې مصر او قطر هڅې پيل کړي دي چې د اسراييلو او حماس ترمینځ نهه مياشتنۍ جګړه ختمه او په پايله کې يې په غزه کې د اسراييلیو يرغملو کسانو او د اسراييلو په بند کې د فلسطينیو قيديانو خوشې کېدو ته لاره هواره شي.
دا په داسې حال کې ده چې په وروستیو کې حماس په وروستیو کې د یرغملو کسانو د خوشې کولو په اړه د خبرو پر پیلولو سلا شو.
حماس د ۲۰۲۳ز کال د اکتوبر پر اوومه پر اسراییلو برید وکړ چې پکې خواوشا ۱،۲۰۰ اسراييليان يې ووژل او ۲۴۰ کسان یې یرغمل کړل. وروسته یوشمېر یرغمل کسان د یو جوړجاړي له لارې خوشې شول.
اسراییلو د حماس د برید په غبرګون کې په غزې تړانګه کې سختې پوځي کاروايۍ ته دوام ورکړی دی.
په غزه کې روغتیايي چارواکي وايي، په هغه جګړه کې د وژل شويو فلسطينيانو شمېر تر ۳۷،۰۰۰ اوښتی دی چې زياتره يې ښځې او ماشومان دي. د جګړې پر مهال له ۸۵،۰۰۰ زيات فلسطينيان ژوبل شوي هم دي.
