پولیس وايي چې د خیبر پښتونخوا په صوابۍ کې یو ورور له رشتې څخه د انکار کولو پر سر خپلې درې خویندې وژلې دي.
د صوابۍ د زیدې تاڼې محرر فضل خالق مشال راډیو ته وویل چې هغه پېښه د جولای پر ۱۱مه سهار شاوخوا شپږ بجې شوې ده.
هغه وايي چې د نجونو پلار عبدالحلیم د پرچې دایرولو پر وخت وویل چې لوڼو او زوی یې د لور سنبل د رشتې په اړه خبرې کولې چې هغوی په بحث کې سره وران شول.
۶۸ کلن عبدالحلیم پولیسو ته ویلي دي چې د ده زوی نوشاد خان غوښتل چې ۲۳ کلنه سنبل یو چا ته ورکړي خو هغې نه منله نو هغه درېواړه خویندې وویشتې.
د تاڼې محرر فضل خالق زیاتوي چې له سنبل پرته د یوې وژل شوې نجلۍ عمر ۲۵ او د بلې ۱۹ کاله دی.
دی زیاتوي چې مقدمه یې دایر کړې او د ملزم د نیولو هڅې یې پیل کړې دي.
په خیبر پښتونخوا کې تر دې مخکې هم ښځې د کورني تاوتریخوالي، په میراث کې د حق او د رشتو پر سر د لانجو او د 'ناموس' په نوم وژل شوې دي. د جولای پر نهمه په صوابۍ کې یو هلک او یوه نجلۍ د 'ناموس' په نوم وژل شوي ول. پولیسو تر پېښې وروسته د نجلۍ ورور نیولی وو.
د پاکستان د بشري حقونو کمېشن په وروستیو کې په خپل کلني رپورټ کې ویلي ول چې په ۲۰۲۳ز کال کې په خیبر پښتونخوا کې د ښځو پر وړاندې د تاوتریخوالي ۳۸۷ پېښې ثبت شوې چې پکې ۲۹۵ ښځې وژل شوې وې.
