د بلوچستان په مرکز کوټه کې په چاودنه کې یو تن وژل شوی او درې نور ټپیان شوي دي.
د شالکوټ د پولیسو ډي اېس پي عابد بخاري ویلي دي چې چاودنه په غربي بای پاس هغه وخت وشوه چې د سرحدي عسکرو یو موټر له هغه ځایه تېریده.
تر چاودنې وروسته، وژل شوی او زخمي کسان د کوټې بولان میډیکل هسپتال ته رسېدلي دي.
تر چاودنې وروسته، ګڼ شمېر کې پولیس او سرحدي عسکر د پېښې ځای ته رسېدلي دي او د پلټنې کار یې پیل کړی دی، خو تر دې دمه یې څوک نه دي نیولي او نه هم یوې ډلې د دې وروستۍ پېښې زمه واري منلې ده.
تر دې مخکې د دې ډول زیاترو پېښو زمه واري بېلتون غوښتونکې بلوڅي وسلوالې ډلې بلوڅ لیبریشن ارمي (بي اېل اې) منلې ده.
د بلوچستان حکومت ویاند شاهد رند مشال راډیو ته ویلي دي چې په پېښه کې د سرحدي عسکرو موټر په نخښه شوی دی.
