په افغانستان کې د طالبانو حکومت د ملګرو ملتونو د امنيت شورا هغه رپورټ رد کړی چې وايي، هغه هېواد د بهرنيو وسلوالو په يوه خوندي ځای بدل شوی دی.
د طالبانو د حکومت وياند ذبيح الله مجاهد د جولای پر ۱۳مه په کابل کې طلوع نيوز ټېلېويژن ته وويل، د امنيت شورا د څار کمېټې وروستی رپورټ د ناسمو معلوماتو پر اساس جوړ شوی دی.
هغه زياته کړه، دوی داعش ډله ځپلې او د القاعده او تحريک طالبان پاکستان په څېر نورې ډلې چې ملګرو ملتونو يادې کړي، په افغانستان کې نشته.
امنيت شورا د جولای پر ۱۰مه په خپور کړي رپورټ کې ويلي چې په افغانستان کې د القاعدې، داعش او تحريک طالبان پاکستان وسلوال شتون او فعاليتونه لري.
تر دې وړاندې د پاکستان ترڅنګ د منځنۍ اسيا يوشمېر هېوادونو هم ويلي چې په افغانستان کې د وسلوالو ډلو موجوديت د دوی امنيت ته جدي ګواښ جوړوي.
